Berisha: Nder ngritja e flamurit shqiptar në Everest

Nga Wikilajme, burimi i lirë i lajmeve që ju mund të shkruani!
Statusi: E mbaruar 19:29, 15 Shkurt 2011 (UTC)
Ju lutem mos bëni asnjë ndryshim thelbësor. Keni ndonjë opinion për këtë lajm? Postojeni!

Pamje nga Mont Everest
Grupi alpinistësh duke ngjitur Mount Everest, viti 2008


Kryeministri Berisha vlerësoi sot nismën e një grupi alpinistësh shqiptarë për të ngritur flamurin shqiptar në majën më të lartë të botës, në Everest, me rastin e 100 vjetorit të pavarësisë së vendit. Zyra e shtypit e qeverisë bëri të ditur se Kryeministri Berisha pati sot një bisedë me anëtarë të Shoqatës Dajti Alpino-Turistik. Alpinistët vinin në këtë takim pas realizimit të një sërë ekspeditash të suksesshme, duke u ngjitur dhe ngritur flamurin shqiptar në Malin e Bardhë dhe Kilimanxharo. Ata e njohën Kryeministrin me projektin e tyre të ardhshëm, ngritjen e flamurit shqiptar në majën e malit më të lartë në botë, Everest, në nderim të 100 vjetorit të shpalljes së pavarësisë.

Kryeministri Berisha u shprehu admirimin për pasionin e tyre, alpinizmin dhe rezultatet e shkëlqyera që ata kanë arritur në aktivitetin e tyre. "E kam ndjekur me kënaqësi aktivitetin tuaj brenda dhe jashtë Shqipërisë dhe ju garantoj se do të përpiqemi t’ju mbështesim në veprimtarinë tuaj. Potenciali i vendit në male është i jashtëzakonshëm dhe është për t’u zbuluar", u shpreh Kryeministri. Kryeministri Berisha i falënderoi në mënyrë të veçantë për projektin e tyre për t’u ngjitur në majën më të lartë të botës, për 100 vjetorin e pavarësisë dhe shprehu mbështetjen e qeverisë për këtë projekt. "Ky është një nder shumë i madh që ju i bëni vendit, kombit, flamurit dhe do të keni mbështetjen e plotë të qeverisë”, u shpreh Kryeministri.

Alpinistët falënderuan Kryeministrin për mbështetjen që u jep veprimtarisë së tyre. Gjatë kësaj bisede u shkëmbyen mendime mbi potencialet që ka Shqipëria për zhvillimin e turizmit malor dhe nxitjes së pasionit për sportet malore tek të rinjtë. Në fund të takimit, grupi i alpinistëve i dhuroi Kryeministrit një album fotografik nga ekspeditat e tyre.

Burimet[redakto]