Kuvend - Nis punimet seanca plenare e radhës

Kuvendi nisi punimet e seancës plenare të radhës, ku pritet të shqyrtohen disa marrëveshje të rëndësishme dypalëshe për bashkëpunimin ekonomik.

Seanca e sotme do të shqyrtojë ratifikimin e marrëveshjes së financimit dhe projektit ndërmjet palës shqiptare, e përfaqësuar nga Ministria e Financave dhe bankës gjermane KFV Frankfurt mbi Main për financimin e projektit "Fondi i Investimeve Sociale IV", e cila do të pasohet nga shqyrtimi i marrëveshjes për financimin me grant të projektit "Shërbime konsulence për forcimin e kapaciteteve të Ujësjellës-Kanalizimeve, Berat - Kuçovë".

Një pr/ligj që pritet të shoqërohet me diskutime është dhe ai "Për barnat dhe shërbimin farmaceutik", si dhe një ndryshim në ligjin "Për sigurimet shoqërore në Republikën e Shqipërisë". Seanca do të mbyllet me diskutimet për çështje jashtë rendit të ditës.

Burimet

• "Kuvend - Nis punimet seanca plenare e radhës" — Radio Televizioni Shqiptar, 01. Prill 2011