Stampa:Lajme të shkurtra

Lajme të shkurtra

20 Maj

Lëvizja Vetëvendosje të enjten ka ri-publikuar kontratën ndërmjet Qeverisë së Kosovës dhe kompanisë “Bechtel-Enka” për ndërtimin e autostradës Vërmicë-Merdare, me vulat dhe nënshkrimet e të dyja palëve. Shpend Ahmeti ka thënë se posedojnë një dokument të “Eversheds”, kompani e kontraktuar nga Qeveria e Kosovës për ta konsultuar në lidhje me kontratën me “Bechtel-Enka”, sipas të cilës kontrata me konsorciumin turko-amerikan është i pafavorshëm për Kosovën.
Komisioni Qendror Zgjedhor i Shqipërisë ka mbyllur për të enjten procesin e numërimit të votave, ndërkohë që ka përfunduar edhe protesta e mbështetësve të socialistëve para selisë së KQZ-së.
Federata e Futbollit e Anglisë (FA) nuk do të marrë pjesë në zgjedhjet për president të FIFA-s, pasi që nuk ka mund të vendosë ndërmjet dy kandidatëve me të cilët ndërlidhen pohime të ndryshme për korrupsion.
Edhe pse me intensitet të shtuar të punës në pastrimin e lumit Lushta që kalon nëpër qytetin e Mitrovicës, punëtorët e Kompanisë rajonale për menaxhimin e mbeturinave “UNITETI” në Mitrovicë, nuk janë të kënaqur me pagat e tyre dhe kërcënojnë sërish me ndërprerje të punës.

19 Maj

Deputetët e Kuvendit të Kosovës kanë kërkuar nga organet e drejtësisë në Kosovë që të angazhohen për ngritjen e aktakuzës për masakrën në Burgun e Dubravës, të kryer nga forcat serbe në maj të vitit 1999, por edhe për masakrat tjera të kryera gjatë luftës në Kosovë.
Ndërkohë që Komisioni Qendror Zgjedhor i Shqipërisë po vazhdon numërimin e votave të kontestuara për kryetar të bashkisë së Tiranës, Partia Socialiste ka nisur protestat në shumë qytete të vendit, përfshirë Durrësin dhe Vlorën.
Drejtues të Ministrisë së Punëve të Brendshme kanë bërë të ditur se tash më është përzgjedhur kompania fituese për pasaportat biometrike dhe se pajisja e qytetarëve të Kosovës me pasaporta të tilla do të fillojë muajin tetor, në rast se gjatë procedurave ligjore nuk haset në ndonjë parregullsi.
Opozita ka vënë në “kryq” Qeverinë e Kosovës për shpenzime të mëdha gjatë shqyrtimit të raportit financiar për Buxhetin e Republikës së Kosovës, për vitin 2010, duke vlerësuar se Qeveria Thaçi jo vetëm që nuk u është përmbajtur premtimeve për ulje të shpenzimeve në sektorë të ndryshëm, por madje i ka rritur ato.