Vëzhgim i rreptë i zgjedhjeve të parakohshme në Maqedoni

OSBE-ODIHR dhe organizatat e tjera ndërkombëtare kanë paralajmëruar vëzhgim të rreptë të zgjedhjeve të parakohshme në Maqedoni. Përfaqësues të lartë të OSBE/ODIHR po shqyrtojnë planin e vëzhgimit të këtyre zgjedhjeve dhe se janë në pritje të ftesës nga ana e Qeverisë së Maqedonisë.

Nga OSBE nuk bëjnë të ditur se cili do të jetë numri i vëzhguesve që do të marrin pjesë në Maqedoni. Asambleja Parlamentare e Këshillit të Evropës miratoi dje vendimin për dërgimin e një komisioni “ad hoc” për vëzhgimin e zgjedhjeve të parakohshme. Mevlut Çavoshogllu, kryetari i AP të KE-së tha se kanë vendosur për dërgimin e një ekip vëzhguesish, por deri tani nuk kanë pranuar ftesën zyrtare nga autoritetet e Shkupit.

OSBE/ODIHR dhe KE pritet të mbërrijnë në vend gjatë javës së ardhshme, pasi që misionet e tyre nuk kanë për qëllim që të vëzhgojnë zgjedhjet vetëm në ditën e votimit, por edhe vëzhgimin e kushteve për organizimin e zgjedhjeve fer dhe demokratike. Një pjesë e partive opozitare kanë hedhur dyshimet për mundësinë e manipulimit të zgjedhjeve të parakohshme, dhe se këto shqetësime i janë përcjellë edhe përfaqësuesve ndërkombëtarë. Partitë politike kanë nisur takimet me ambasadorë të vendeve të BE-së, nga ku kanë kërkuar monitorim sa më të rreptë ndërkombëtar dhe angazhim për zgjedhje fer dhe demokratike.

Burimet

• "Vëzhgim i rreptë i zgjedhjeve të parakohshme në Maqedoni" — Lajmet.com, 12. Prill 2011